ສະພາແຫ່ງຊາດ ຮັບຮອງເອົາຮ່າງກົດໝາຍວ່າດ້ວຍປ່າໄມ້ ສະບັບປັບປຸງ ໃຫ້ທັນສະໄໝ ແລະ ມີປະສິດທິຜົນ
ສະພາແຫ່ງຊາດ ຮັບຮອງເອົາຮ່າງກົດໝາຍວ່າດ້ວຍປ່າໄມ້ ສະບັບປັບປຸງ (2019) ໃນກອງປະຊຸມສະໄໝສາມັນຄັ້ງທີ 7 ຂອງສະພາແຫ່ງຊາດ ໃນອາທິດທີ່ຜ່ານມາ (ວັນທີ 14 ມິຖຸນາ 2019).
ເຊິ່ງການນຳສະເໜີ ຜ່ານຮ່າງເພື່ອຮັບຮອງເອົາກົດໝາຍສະບັບປັບປຸງ ໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII ນີ້ມີ ບັນດາ ສະມາຊິກສະພາແຫ່ງຊາດ (ສສຊ) ໄດ້ມີການເຈາະຈີ້ນ ກ່ຽວກັບເນື້ອໃນຂອງກົດໝາຍທີ່ຢູ່ໃນ ສະບັບປັບປຸງນີ້:
- ທ່ານ ສົມໃຈ ເພັດສີນວນ ສສຊ ເຂດເລືອກຕັ້ງທີ 12 ແຂວງຄຳມ່ວນ ໄດ້ມີຄຳເຫັນຕໍ່ມາດຕາ 24 ໂດຍສະເພາະ ກຳນົດກ່ຽວກັບການສຳຫຼວດ ເພື່ອຂຸດຄົ້ນໃນເຂດຫັນປ່ຽນທີ່ດິນປ່າໄມ້ ໄດ້ສະເໜີໃຫ້ຕື່ມຊື່ຂອງປະເພດປ່າໄມ້ເຊັ່ນ ໂດຍໃຫ້ມີການກຳນົດຢ່າງຈະແຈ້ງເຊັ່ນ: ປ່າຜະລິດ ປ່າຊົມໃຊ້ ແລະ ປ່າປະເພດອື່ນໆ. ແລະ ໃນມາດຕາ 62 ການຊົມໃຊ້ປ່າໄມ້ໃນເຂດທ້ອງຖິ່ນບ້ານ ແມ່ນສະເໜີໃຫ້ຕື່ມບາງຄຳສັບໃນການກຳນົດການນຳໃຊ້ໄມ້ ເພື່ອປະໂຫຍດຕ່າງໆເຊັ່ນ: ການສ້າງວັດ, ສ້າງຂົວ ແລະ ການນຳໃຊ້ສ້າງເຮືອນ
- ທ່ານ ບຸນໄທ ສີເທບ ສສຊ ເຂດເລືອກຕັ້ງທີ 7 ແຂວງໄຊຍະບູລີ ໄດ້ປະກອບຄຳເຫັນໃສ່ມາດຕາ 81, 45, 48, 52 ແລະ 53. ໃນນັ້ນສະເພາະມາດຕາ 48 ການປົກປັກຮັກສາປ່າສະຫງວນ ທ່ານໄດ້ສະເໜີໃຫ້ປະຊາຊົນທີ່ຢູ່ຕິດເຂດປ່າສະຫງວນ ຄວນກຳນົດລະອຽດ ກ່ຽວກັບການມີສ່ວນຮ່ວມການປົກປັກຮັກສາ ແລະ ປະຊາຊົນຢູ່ເຂດນັ້ນ ຈະນຳໃຊ້ໄມ້ ຫຼືເນື້ອທີ່ປ່າໄມ້ໃນຮູບການໃດ ແລະ ສະເໜີໃຫ້ຂຽນກຳນົດເພີ່ມຕື່ມຢ່າງລະອຽດ ແລະ ຂໍ້ກຳນົດໃນການມີສ່ວນຮ່ວມສະກັດກັ້ນໄຟໄໝ້ລາມປ່າ ເພາະໃນຮ່າງກົດໝາຍຍັງຂຽນໜ້ອຍບໍ່ທັນຮັດກຸມເທົ່າທີ່ຄວນ.
ບຸນສອງ ອີນໄຊລາວ
http://insidelaos.com/2019/06/14/9204/
