ການສຳຫຼວດການໃຊ້ຄວາມຮຸນແຮງຕໍ່ເດັກນ້ອຍແຫ່ງຊາດ - ເຊິ່ງເປັນການສຳຫຼວດຂໍ້ມູນກ່ຽວກັບບັນຫາດັ່ງກ່າວຄັ້ງທຳອິດໃນ ສປປ ລາວ - ແມ່ນຈັດຕັ້ງໂດຍສູນສະຖິຕິແຫ່ງຊາດ ແລະ ຄະນະກຳມາທິການແຫ່ງຊາດວ່າດ້ວຍແມ່ ແລະ ເດັກ, ພາຍໃຕ້ການຮ່ວມມືຂອງກະຊວງແຮງງານ ແລະ ສະຫວັດດີການສັງຄົມ ແລະ ສູນກາງສະຫະພັນແມ່ຍິງລາວ, ພາຍໃຕ້ການສະໜັບສະໜູນທາງດ້ານທຶນຮອນ ແລະ ວິຊາການຈາກອົງການ UNICEF ແລະ CDC. ການສຳຫຼວດຕົວຢ່າງຄົວເຮືອນທົ່ວປະເທດ ເຊິ່ງມີການເກັບກຳຂໍ້ມູນໃນລະຫວ່າງ ເດືອນຕຸລາ ແລະ ພະຈິກ 2014, ສະແດງຜົນການຄາດຄະເນ ອັດຕາສ່ວນການໃຊ້ຄວາມຮຸນແຮງທາງຮ່າງກາຍ, ທາງໃຈ ແລະ ທາງເພດຕໍ່ເດັກ, ແລະ ຂໍ້ມູນຂ່າວສານກ່ຽວກັບ ສະຖານະການ ການໃຊ້ຄວາມຮຸນແຮງທີ່ເກີດຂຶ້ນ.